Tysdag 28. april 2026 inviterte FAU ved Flatraket skule og Flatraket bygdelag til folkemøte på klubbhuset for å drøfte den pågåande skulesaka (endring i skulestruktur) i Stad kommune.

Bakgrunnen for møtet er at kommunen har starta ei utgreiing der det mellom anna vert vurdert om Flatraket skule skal slåast saman med Flatraket barnehage til eit oppvekstsenter. Det vert òg vurdert om 1.–4. klasse ved Flatraket skule og Flatraket barnehage skal samlast som ei eining ved Flatraket skule, medan 5.–7. klasse vert flytta til Selje skule.

Trass i kort frist frå innkalling til møtet, møtte i underkant av 30 personar opp. Dette må reknast som god oppslutning, særleg med tanke på at saka i første rekkje gjeld familiar med barn i barnehage- og barneskulealder.

På møtet vart det orientert om saka og forslaget frå kommunedirektøren. Det vart vidare drøfta kva konsekvensar ei slik endring kan få for elevar, føresette, skulemiljøet og bygda som heilskap. Det kom fram fleire innspel og synspunkt frå dei frammøtte.

Reaksjonane på den skisserte endringa i skulestrukturen var, som venta, negative. Dei frammøtte var tydelege på at ei slik løysing ikkje er til barnas beste. Særleg vart det peika på at elevar på mellomtrinnet vil få ein lang reiseveg med buss til Selje, om lag 30 kilometer og 1 time kvar veg. For mange vart dette trekt fram som ei urimeleg belastning i skulekvardagen. Barna er ei sårbar gruppe, og bør ikkje framstå som ein økonomisk salderingspost i kommunerekneskapen.

Det vart òg uttrykt sterk uro for kva ei nedbygging av Flatraket skule vil bety for bygda. Skulen er ein viktig del av lokalsamfunnet, og ei flytting av 5.–7. klasse vil kunne svekkje både skulemiljøet, nærmiljøet og framtidig bolyst på Flatraket. Fleire peika på at ei slik utvikling kan gjere det mindre attraktivt for barnefamiliar å busetje seg og bli verande i bygda.

Det vart utarbeidd eit felles innspel frå møtet. Dette vil bli sendt til administrasjonen og sentrale politikarar i Stad kommune i forkant av den vidare politiske handsaminga. Bygda ønskjer at dagens struktur og ordning vert vidareført.

Flatraket bygdelag og FAU ved Flatraket skule takkar alle som møtte fram og engasjerte seg i ei viktig sak for bygda vår.

Lenker:

• Fjordenes Tidende debatt (Ottar Nygård): «Her blir det ingen vinnarar, men taparane dei kan bli mange» | Borna som økonomisk kasteball? | Her må altså borna frå Flatraket måtte gå på 3 forskjellige skular for å fullføre grunnskulen.
• Fjordenes Tidende: Vil vite kva det kostar å kjøpe skuleplassar i nabokommunen | Arbeidarpartiet, Senterpartiet og Høgre vil vite kva det kostar å kjøpe skuleplassar for elevar frå Flatraket på Skavøypoll skule. | – Vi ønsker ikkje å gå vidare med ei utgreiing av flytting av dei eldste elevane frå Flatraket til Selje skule.
• Fjordenes Tidende: – Eg er rett og slett forbanna | Tidlegare Selje-ordførar Ottar Nygård er kraftig provosert over at Stad kommune igjen foreslår å utgreie å flytte elevar frå Flatraket skule til Selje.
• Fjordabladet: Bygda er i opprør | – Ikkje i min villaste fantasi kunne eg tenke meg at diskusjonen om skulen skulle kome i år, seier Thomas Bigset, leiar i Flatraket bygdelag.
• Fjordenes Tidende: – Ingen kjem til å etablere seg her om barneskulen blir bygd ned | Innbyggarar på Flatraket fryktar at arbeidet dei over år har lagt ned for bulyst og tilflytting er forgjeves om barneskuletilbodet blir bygd ned.
• Fjordenes Tidende: Vil ikkje sende ungane i buss opp til to timar kvar dag | Det var stort engasjement da bygdelaget arrangerte folkemøte om dei føreslåtte endringane i grunnskuletilbodet på Flatraket tysdag. | – Vi må slutte å møtast på denne måten. Det er under eitt år sidan sist vi sat her med akkurat den same møteagendaen.
• Fjordenes Tidende: Sterk uro for nedbygging av skulen | Trass i kort frist frå innkalling til møtet, møtte i underkant av 30 personar opp, på folkemøte om skulesaka på Flatraket.
• Fjordenes Tidende: Føreslår å flytte dei eldste elevane og lage storskule i sentrum | Kommunedirektøren føreslår å greie ut å flytte elevane i 5.–7. klasse på Flatraket skule til Selje skule og å lage ein storskule på Nordfjordeid.
• Fjordenes Tidende: – Vi trudde det skulle gå meir enn eitt år før forslaget kom opp igjen | FAU ved Flatraket skule og bygdelaget engasjerer seg nok ein gang for å behalde dagens skuletilbod på Flatraket.
• Stad kommune: Saksframlegg | Oppfølging av Tiltaksplan 2026-2029 – Strukturendring barnehage og skule

Sist oppdatert 10.05.2026 av Bjørn Roger Rasmussen.